Qeveria zvicerane akuzohet nga parlamenti për “diktaturë të koronës”

Martullo-Blocher (SVP): "Këshilli Federal rregullon gjithçka deri edhe në detajet më të vogla, madje edhe atë se kush lejohet të ulet ku"

Në debatin e zgjatur  lidhur me koronavirusin, që është zhvilluar sot dhe po vazhdon,  gjatë seancës parlamentare në Dhomën Nacionale të Parlamentit të Zvicrës, kanë mbizotëruar kritikat nga partia SVP drejtuar qeverisë, për “dikaturë të koronës”.

“Çdo ditë, liria ekonomike dhe liria e lëvizjes kufizohen ose shfuqizohen masivisht nga Këshilli Federal”, është shprehur Magdalena Martullo-Blocher (Graubünden) në emër të grupit parlamentar të SVP, raporton srf.ch.

Sipas saj, “Këshilli Federal rregullon gjithçka deri edhe në detajet më të vogla, madje edhe atë se kush lejohet të ulet ku”.

Martullo-Blocher ka këmbëngulur në akuzën se Këshilli Federal “e ka kthyer Zvicrën në një diktaturë, transmeton albinfo.ch. “Sipas përkufizimit, diktatura përbëhet nga një pakicë që arbitrarisht sundon mbi shumicën”.

Prandaj, është detyra e parlamentit të kufizojë kompetencat e Këshillit Federal me ligjin për kovidin.

Megjithatë, grupi parlamentar i SVP pajtohet me faktin se data e hapjes e caktuar për 22 mars është shkruar në ligj, ka deklaruar Martullo-Blocher.

 

---