Zviceranët “pushtojnë” dyqanet, pas 7 javë mbylljeje

Zona të nxehta speciale për ata që janë të interesuar të bëjnë pazar janë sigurisht: dyqanet si ai i mobileve, Ikea, qendra tregtare Shoppi Tivoli në Spreitenbach, etj

Dyqanet në Zvicër janë lejuar të rihapen pa asnjë kufizim, sa i përket profilit të mallrave që shiten, që nga e hëna.

Nxitimi është i madh, njerëzve u është dashur të prisnin 7 javë për hapjen e tyre, shkruajnë mediat zvicerane sot.

Raportohet për formimin e radhëve të gjata, veçanërisht në qendrat e mëdha tregtare.

Zona të nxehta speciale për ata që janë të interesuar të bëjnë pazar janë sigurisht: dyqanet si ai i mobileve, Ikea dhe qendra e madhe tregtare Shoppi Tivoli në Spreitenbach AG, transmeton albinfo.ch.

Në Bahnhofstrasse të Cyrihut që është ndër rrugët më të shtrenjta në botë, gjithashtu, njerëzit qëndrojnë në radhë për një kohë të gjatë përpara dyqanit të tekstileve, H&M.

E gjitha kjo po ndodh në një mot të këndshëm e me diell.

“Ne shpresojmë të shëtisim nëpër rrugë pasi moti është i mirë,” thotë një çift i moshuar për SRF. Të tjerët bëjnë pazar në rrugën më të famshme të dyqaneve në Zvicër në mëngjes. Këtë e bëjnë në mënyrë që të shmangin rrezikun e futjes në turmë, në orët emëvonshme.

“Unë kam dalë shumë herët sepse shumë njerëz shkojnë më vonë për të blerë”, përgjigjet një burrë që, siç e thotë, ka nevojë për të blerë nënkëmisha, përcjell albinfo.ch. Siç tregon inspektimi në vend, detyrimi për vënien e maskës dhe koncepti i mbrojtjes po respektohen nga blerësit.

---