Program artistik nga Vjena: “Dashni për Pavarësi”

Këshilli Koordinues i Shoqatave Shqiptare në Austri, në bashkëpunim me organizatën Kä dhe “Tv Syri Vision”, ndonëse në kohë pandemie, do të sjellin një program artistik kushtuar festës së Pavarësisë së Kosovës.

I emëruar “Dashni për Pavarësi”, ky program artistik do të transmetohet  pikërisht në ditën e Pavarësisë, më 17 shkurt 2021, duke filluar nga ora 20.00.

Programi fillon me interpretimin e mezzosopranos Flaka Goranci dhe bashkëbisedim edukativ dhe informativ me dy fëmijë shqiptarë: Nita dhe Tomori që jetojnë në Vjenë.

Grupi “Ashikët” do të sjellin një repertor të larmishëm me këngë patriotike dhe popullore nga të gjitha trevat shqiptare.

Ata do të përformojnë në ambientet e Muzeut Etnografik të Gjakovës, xhiruar nga produksioni “Tv Syri Vision”, i cili do të bëjë edhe transmetimin e këtij manifestimi.

Përveç kësaj, në këtë program do të ketë prezantim të arkitekturës tradicionale nga qytete të ndryshme të Kosovës; prezantim të zejtarisë në Kosovë si dhe prezantim e pamje të arkitekturës tradicionale të qytetit të Vjenës.

Këtë program gjithashtu mund ta ndiqni edhe në një link të posaçëm online në Youtube, i cili do të shpërndahet edhe në faqet e Këshillit Koordinues dhe faqet e tjera të shoqatave bashkëpunuese me Këshillin.

Ky organizim bëhet në kuadër të “Javëve të Kulturës Shqiptare në Austri”.