Sot pritet të aterojnë 15 fluturime në aeroportin e Prishtinës

Foto: Aeroporti i Prishtinës

Zgjedhjet parlamentare në Republikën e Kosovës, të cilat do të mbahen këtë të diel, më 14 shkurt, kanë zgjuar interesin e bashkatdhetarëve për të votuar në mënyra të ndryshme.

Numër i madh i tyre kanë votuar përmes postës, ku sipas të dhënave të deritanishme, rreth 16 mijë fletëvotime kanë arritur të deponohen në Dhomën e operacionit të votimit me postë.

Por, përveç votimeve me postë, një numër i madh i bashkatdhetarëve kanë vendosur të vijnë në vendlindjen e tyre për të votuar. Vetëm gjatë ditës së sotme pritet të aterojnë 15 fluturime nga diaspora në Aeroportin Ndërkombëtar të Prishtinës.

“Më 12 shkurt në ANP janë 15 fluturime në ardhje, (8) prej tyre nge Zvicra, ndërsa pjesën tjetër e përbëjnë fluturimet nga Gjermania (1), Austria (2), Turqia (2) , Suedia (1) dhe Belgjika (1)”, ka thënë Valentina Gara.

Ndërsa të shtunën do të aterojnë 29 fluturime në aeroportin e Prishtinës, ku shumica do të jenë nga Zvicra.

Megjithatë, përveç arritjeve me aeroplanë, disa bashkatdhetarë të tjerë kanë zgjedhur të vijnë në Kosovë edhe me autobusë të organizuar enkas për zgjedhje. Albinfo.ch ka raportuar edhe për këtë, duke iu referuar fotografive të publikuara nga partitë politike që i kanë organizuar këto udhëtime.