Mustafi, në pritje të debutimit me Schalken

Mbrëmjen e djeshme Shkodran Mustafi ka marrë një lajm të mirë.

Mbrojtësi shqiptar ditë më parë ka kompletuar transferimin te Schalke 04 nga Arsenali, por ka qenë në izolim për shkak të fluturimit të tij nga Anglia, transmeton albinfo.ch.

Gjermania e ka futur në zonën e kuqe Britaninë e Madhe dhe kjo e ka detyruar Mustafin të qëndrojë i izoluar.

Megjithatë, mbrojtësi shqiptar ka bërë disa teste për COVID-19 dhe variantin e ri të coronavirusit, por që të gjitha i kanë dalë negative.

Tani te Schalke po presin dritën e gjelbërt të autoriteteve shëndetësore për ta inkuadruar Mustafin në lojë.

Trajneri i Schalke 04, Christian Gross, ka thënë se ekziston një mundësi që Mustafi të debutojë ndaj RB Leipzig të shtunën.

“Ekziston mundësia që Mustafi të luajë. Ai ka një qëndrim shumë profesional. Nëse autoritetet shëndetësore na japin dritën e gjelbër, atëherë ai do të jetë me skuadrën. Unë nuk e përjashtoj mundësinë që ai të parqitet ndaj Leipzig”, ka deklaruar Gross.