“Diaspora kosovare: Faktor ndryshimi apo vegël politike?

Platfroma Albinfo.ch organizon debat virtual: “Diaspora kosovare: Faktor ndryshimi apo vegël politike?

Zgjedhjet në Kosovë po afrohen. Nisur nga fakti se në Zvicër jeton një komunitet i madh i qytetarëve të Kosovës, platforma e diasporës albinfo.ch, duke realizuar edhe misionin e saj në përafrimin e diasporës me vendet e prejardhjes, organizon një debat virtual për diasporën shqiptare të Kosovës në Zvicër.

Tema e debatit është: DIASPORA KOSOVARE: FAKTOR NDRYSHIMI APO VEGËL POLITIKE?

Në këtë debat do të marrin pjesë: Dr. Bashkim Iseni, themelues i albinfo.ch dhe ligjërues në Universitetin e Friburgut, Migjen Kajtazi, aktivist dhe kolumnist në Lozanë, Njomza Gutaj,aktiviste e Lëvizjes Vetëvendosje në Zvicër, Nazmi Jakurti, Docent inordinar në PH Bern dhe aktivist, njohës i çështjeve të diasporës, Leonard Ferati nga shoqata “Du me Votu” Gjenevë. Debatin e moderon redaktori i Albinfo.ch, Alban Hamza.

Zgjedhjet e fundit dhe ato të 14 shkurtit 2021 kanë në qendër të vëmendjes politike votën e diasporës jashtë Kosovës, respektivisht në vendet perëndimore dhe, në veçanti, në Zvicër.

Vështrimet e fundit na bëjnë të konstatojmë një mobilizim të madh të mërgatës kosovare në Zvicër dhe më gjerë për zgjedhjet e parakohshme të muajit shkurt 2021 në Kosovë.

Si të shpjegohet ky interesim i madh dhe mllef ndaj faktorit politik kosovar në pushtet deri më tani? Kush janë aktorët e diasporës që janë aq shumë të aktivizuar? Përse mërgata shqiptare mbështet aq fuqishëm Vetëvendosjen? A është ky edhe faktor shpjegues i pengesave që i bëhen diasprës nga institucionet kosovare që ajo të përfshihet në proceset politike në Kosovë përmes votës së saj? Por, në anën tjetër, a i takon diasporës të ketë një ndikim të tillë në një vend ku de fakto ajo nuk jeton? A mos po instrumentalizohet vota e saj? Çka parashohin partitë në garë në programin e tyre për diasporën? Çka nëse pason ndryshimi në Kosovë dhe qasja ndaj diasporës mbetet e pandryshuar? A duhet të mobilizohen pjesëtarët e diasporës shqiptare po ashtu edhe në vendet ku ata janë lindur dhe votojnë? Përse nuk ndodh kjo ?

Debati mbahet ditën e premte, më 5 shkurt • ORA 20.00 • Zoom, Livestream në Facebook të Albinfo.ch

---