Gjermania do të zgjasë masat deri në mes të shkurtit

Numri i infeksioneve të reja të raportuara për 100,000 banorë (130) është ende shumë mbi vlerën e synuar prej 50

Bllokimi aktual për shkak të koronavirusit në Gjermani do të zgjatet deri në mes të shkurtit.

Kancelarja Angela Merkel, siç raportojnë disa media gjermane, ka marrë këtë vendim bashkë me kryeministrat e republikave (landeve) të vendit në një konferencë të përbashkët të mbajtur të martën pasdite, shkruan srf.ch.

Përveç kësaj, në transportin publik tash e tutje do të jetë e detyrueshme vënia e maskës mjekësore. Maskat prej tekstili, të vetë-qepura nuk do të jenë më të lejuara, transmeton albinfo.ch.

Fillimisht, bllokimi (Lockdown) në Gjermani ishte caktuar të kryhej në fund të janarit.

Meqenëse numri i infeksioneve të reja të raportuara brenda shtatë ditëve për 100,000 banorë (130) është ende shumë mbi vlerën e synuar prej 50, është vendosur të zgjaten masat e zbatueshme.

---