Kosova miraton planin për zbatimin e marrëveshjes me Serbinë

Keystone (AP Photo/Evan Vucci)

Qeveria e Kosovës e ka mbajtur sot mbledhjen e radhës, ku ndër tjera ka shqyrtuar edhe një propozim-vendim lidhur me marrëveshjen ndërmjet Kosovës dhe Serbisë, të nënshkruar në Shtëpinë e Bardhë në Uashington.

Qeveria e Kosovës ka miratuar sot planin për zbatimin e marrëveshjes për normalizim ekonomik ndërmjet Kosovës dhe Serbisë, të arritur më 4 shtator në Shtëpinë e Bardhë, në prani të presidentit të SHBA-së, Donald Trump.

Zëvendëskryeministri Driton Selmanaj tha se kanë identifikuar veprimet kyçe për zbatimin e marrëveshjes.

“Duke u bazuar në këto marrëveshja ka identifikuar veprimet kryesore, duke qenë se disa pika kanë qenë më herët. Pritjet nga dikasteret të merren të gjitha masat për zbatimin e këtij plani”, tha ai.

Ekzekutivi po ashtu ka shqyrtuar dhe miratuar edhe propozim-vendimin për themelimin e Grupit Punues për përgatitjen e analizës për themelimin e Institutit për Hulumtimin e Krimeve të kryera gjatë luftës në Kosovë, shkruajnë mediat shqiptare, përcjell albinfo.ch.