Qeveria austriake paditet rreth menaxhimit të koronavirusit në një qendër skijimi

Keystone (Roland Schlager/APA via AP, Pool)

Një organizatë private austriake për të drejta të konsumatorit ka dorëzuar të mërkurën katër padi civile kundër Qeverisë së Austrisë, të lidhura me shpërthimin e koronavirusit në disa zona të skijimit në rajonin Tyrol, më herët gjatë këtij viti.

Asociacioni për Mbrojtjen e Konsumatorëve ka thënë se megjithatë një padi në emër të një grupi personash do ta ketë mbajtje për një periudhë të pacaktuar, shkruan Rel, përcjell Albinfo.ch

Zona turistike Ischgl, është përmendur në padinë e përbashkët të pushuesve nga 45 shtete të ndryshme të botës, pasi besohet se ata më pas kanë dërguar virusin në vendet e tyre.

Autoritetet kanë thënë se kanë vepruar sipas informacioneve që kanë pasur atëbotë.

Rasti i parë në fshatin e skijimit është raportuar më 7 mars, mirëpo Agjencia për Shëndetin Publik në Austri ka thënë se beson që rastet e para atje mund të kenë qenë nga 5 shkurti.

Asociacioni për Mbrojtje të Konsumatorëve, ka thënë se katër raste civile do të dorëzohen në emër të individëve dhe të gjitha janë të lidhura me këtë fshat turistik.

Pushuesit janë duke kërkuar dëmshpërblim në vlerë të 100,000 eurove.

Ky Asociacion i ka përshkruar paditë civile si raste të testimit, pasi ka thënë që më shumë se 6,000 persona nga shumë shtete të botës janë paraqitur për të nisur padi të ngjashme vitin tjetër.

Shumica prej pushuesve janë nga Gjermania, mirëpo në këtë grup përfshihen edhe banorë të Austrisë, Mbretërisë së Bashkuar dhe Shteteve të Bashkuara.

Ky Asociacion i ka shkruar edhe kancelarit austriak, Sebastian Kurz duke i bërë thirrje që të pajtohet për marrëveshje.