Të paktën tre veta humbin jetën në një aksident ujor në Zvicër

Pas një stuhie të fuqishme, katër veta janë raportuar të zhdukur. Tre prej tyre janë gjetur të vdekur, njofton Policia e Kantonit St. Gallen

Në Calfeisental, në kantonin e Shën Gallen, tre persona kanë humbur jetën në një aksident duke ushtruar sportin kanioning, shkruan srf.ch. Një person konsiderohet i zhdukur.

Policia e kantonit St. Gallen ka raportuar se të aksidentuarit ishin turistë spanjollë, transmeton albinfo.ch. Aksidenti ka ndodhur të mërkurën, para orës 19 të mbrëmjes, në grykën Parlitobel afër fshatit St. Martin.

Pas një stuhie të fuqishme që ka goditur këtë zonë, katër veta janë raportuar të zhdukur, njofton Policia e Kantonit St. Gallen. Tre prej tyre janë gjetur të vdekur gjatë natës, ndërsa i katërti është ende i zhdukur.

Një numër i madh i punëtorëve të shpëtimit janë angazhuar për gjetjen e të aksidentuarve, përcjell albinfo.ch. Florian Schneider, zëdhënës i policisë së kantonit, ka thënë: “Në veprim kanë qenë disa helikopterë Rega, pastaj specialistë alpinë të shpëtimit dhe patrulla të policisë kantonale”.

(Fotot: Screenshot SRF)

---