Po të bëhej bllokimi një javë më vonë, do të kishim 6000 vdekje më shumë

Por nga ana tjetër, po të ishte bërë ai shtatë ditë më parë, do të shpëtoheshin rreth 1.600 jetë njerëzish

Bllokimi (“Lockdown”)i aktiviteteve publike i bërë më 17 mars në Zvicër, ka shpëtuar mijëra jetë njerëzish. Kështu thonë të paktën hulumtuesit nga Berna.

Sipas një llogaritje mbi bazë modeli, të realizuar nga Universiteti i Bernës, një bllokim i një javë më vonë do të kishte rezultuar me rreth 6.000 vdekje të tjera, shkruan “Tages Anzeiger”.

Por nga ana tjetër, po të ishte bërë ai shtatë ditë më parë, do të shpëtoheshin rreth 1.600 jetë, transmeton albinfo.ch. Sipas versionit me vonesë, spitalet do të ishin mbingarkuar – rreth 1900 pacientë do të “konkurronin” për një shtrat në një njësi të kujdesit intensiv në të njëjtën kohë.

Epidemiologu Christian Althaus dhe kolegët e tij të universitetit në fjalë kanë zhvilluar një model të detajuar që mund të përdoret, për shembull, për të llogaritur përdorimin në njësitë e kujdesit intensiv, përcjell albinfo.ch

Duke qenë se  gjatë muajit mars numri i të infektuarve katërfishohej për çdo javë, vonesa prej një dite do të thoshte rreth 500 vdekje më shumë në ditë.

Ndërkaq, në kushtet në të cilat është vepruar, me masat e ndërmarra gjatë gjithë kësaj kohe prej më shumë se 4 muajsh, në Zvicër deri më tani janë raportuar rreth 1700 vdekje nga Covid-19.

---