Më 3 qershor Italia do t’i hapë kufijtë

Nga 3 qershori Italia hap kufijtë dhe heq pothuajse të gjitha kufizimet

Është bërë e ditur se qeveria italiane ka aprovuar një dekret të ri ligjor me masa urgjente në përballimin e pandemisë Covid-19, përcjell albinfo.ch.

Sipas informacioneve, thuhet se dekreti përcakton një kuadër normativ kombëtar masash që hyjnë në zbatim nga data 18 maj deri më 31 korrik 2020, e që me anë të urdhëresave shtetërore, rajonale e komunale vendosin rregullimin e lëvizjes së personave fizikë si dhe mënyrën e zhvillimit të aktiviteteve tregtare, prodhuese e sociale.

Lëvizja e lirë lejohet prej datës 18 maj e deri më 2 qershor 2020 nga një komunë në tjetrën, brenda të njëjtit rajon, e ndalohet lëvizja nga një rajon në tjetrin me mjete publike e private.

Ndërkohë prej datës 3 qershor 2020 do të lejohet lëvizja e lirë në gjithë territorin kombëtar e limitimet mund të kryhen vetëm nga urdhëresa rajonale në varësi të rrezikut epidemik, i pranishëm në këto zona.

Gjithashtu prej datës 3 qershor Italia hap kufijtë e lejon lëvizjet me vendet e tjera e që mund të limitohen vetëm nga vendime shtetërore e marrëdhënie mes vendeve në varësi të riskut epidemik e në përputhje me kufizimet e rregulloreve të vendosura nga Bashkimi Evropiane e nga detyrimet ndërkombëtare.

Dekreti i ri qeverisë italiane konfirmon ndalimin e lëvizjes për personat në regjim karantinimi deri sa strukturat shtetërore të vërtetojnë shërimin e tij nga Covid-19.

Do të vazhdojë të jetë i ndaluar grumbullimi i njerëzve në vende publike e të hapura.

Aktivitetet tregtare e prodhuese do të jenë të hapura e do të respektojnë protokollin kombëtar të sistemit të sigurisë së shëndetit në punë e të distancimit social.

Prej datës 18 maj do të hapen të gjitha objektet e kultit të të gjitha besimeve, si dhe palestrat e pishinat. /Albinfo.ch

 

 

 

---