Italia e falënderon Shqipërinë, shqiptarët kurrë nuk e braktisin mikun

Shqipëria ka dërguar 30 mjekë dhe infermierë në Itali, në frontin e parë në luftën kundër virusit korona

Kryeministri italian Giuseppe Conte ka shprehur mirenjohjen për Shqipërinë, pasi 30 mjekë dhe infermierë iu bashkuan frontit të parë të luftës kundër koronavirusit në spitalet e tejmbushura të rajoneve veriore.

Conte ka postuar në rrjetin social Twitter fjalën e kryeministrit shqiptar, Edi Rama, i cili ndër të tjera thotë se shqiptarët dhe Shqipëria nuk e braktisin kurrë mikun që gjendet në vështirësi, përcjell albinfo.ch.

Italia ka humbur më shumë se 10 mijë persona nga pandemia, spitalet janë në gjendje kolapsi, pasi edhe nuk mjaftojnë kapacitetet për të përballuar mbingarkesën. Dhjetëra mjekë e infermiere gjithashtu nuk ia dolën ta mposhtin sëmundjen.

Ndërkohë, kreu i LEGA-s, ish-ministër i Brendshëm italian, Matteo Salvini, ka telefonuar kryeministrin shqiptar, Edi Rama, duke e falënderuar për ndihmën me dërgimin e 30 mjekëve dhe infermierëve në luftën kundër koronavirusit.

Salvini është shprehur se me këtë vendim Shqipëria ka demonstruar një ndjeshmëri dhe bujari, që Italia nuk do ta harrojë.

“Një falënderim për popullin shqiptar dhe qeverinë e tij, që duke dërguar mjekët dhe infermierët kanë demonstruar një ndjeshmëri dhe një bujari që nuk do ta harrojmë”, tha Salvini.

Ai i ka premtuar kryeministrit shqiptar, Edi Rama që kur të mbarojë emergjenca, do të bëjë një vizitë në Shqipëri.

---