10 zviceranë presin për evakuim nga Kina

Pas fluturimit, ata nuk mund të vijnë menjëherë në Zvicër. Franca ka hapur një qendër karantine në jug të vendit, ku ata duhet të qëndrojnë dy javë

Zyra Federale e Shëndetit Publik ka informuar sot në një konferencë për media lidhur me gjendjen e qytetarëve zviceranë në qytetin kinez të prekur nga koronavrusi, Wuhan.

Dhjetë persona nga krahina e Hubei aktualisht po përpiqen për t`u kthyer në Zvicër, shkruan sda.ch. Kjo u bë e ditur për mediat në Bernë të premten nga Hans-Peter Lenz nga Departamenti i Jashtëm (EDA), transmeton albinfo.ch. Tre nga këta gjenden në vetë qytetin e izoluar, Wuhan, shtatë të tjerët jetojnë në zonën përreth.

Franca ka pranuar të bëjë transportin ajror të dhjetë qytetarëve zviceranë. Por, kjo duhet të bëhet në kushte të caktuara: së pari do të fluturonin shtetasit francezë, pastaj qytetarët e BE-së dhe së treti njerëzit nga vendet e treta miqësore si Zvicra. Kjo është arsyeja pse nuk kishte asnjë zviceran në fluturimin e parë francez.

Fluturimi i radhës, ku do të jenë edhe zviceranët, me siguri do të bëhet natën në mes të të shtunës dhe të dielës, përcjell albinfo.ch. Lenz ka thënë se ishte organizuar një transport autobusi për njerëzit në regjion. Por, të prekurit janë vetë përgjegjës që të arrijnë në kohën e duhur në pikën e nisjes.

Pas fluturimit të evakuimit, dhjetë personat nuk mund të vijnë menjëherë në Zvicër. Franca ka hapur një qendër karantine në jug të vendit. Të prekurit do të duhet të qëndrojnë atje për dy javë, para se të bëhet i mundur një udhëtim i mëtejshëm, gjegjësisht kthimi në Zvicër.

---