KQZ nis verifikimin e zarfave nga Serbia me veshje speciale

Komisioni Qendror i Zgjedhjeve ka nisur verifikimin e zarfeve nga Serbia me veshje speciale.

Valmir Elezi, zëdhënës i KQZ-së, në një prononcim për mediat kosovare ka thënë se ky proces ka për qëllim të verifikojë një fletëvotim me personin që e ka dërguar pakon, përcjellë albinfo.ch.

Sipas tij, kështu do të dihet nëse është regjistruar suksesshëm si votues jashtë vendit.

“Kemi filluar me shqyrtimin dhe vlerësimin e zarfeve të supozuara me fletëvotime që kanë ardhur nga Serbia. Ky vlerësim është i domosdoshëm, pasi ka për qëllim të identifikojë një fletëvotim me personin që e ka dërguar pakon. Pra, që ta dimë nëse fletëvotimi i dërguar është nga një votues i regjistruar suksesshëm si votues jashtë vendit. Pasi të bëhet ky vlerësim, do ta dimë saktë se sa është numri i fletëvotimeve të aprovuara apo të refuzuara. Vetëm fletëvotimet e aprovuara numërohen“, tha Elezi.

Ai shtoi se për këtë proces Komisioni Qendror i Zgjedhjeve është në kontakt me institucionet e tjera.

“Për këtë proces ne jemi në kontakt dhe bashkëpunim me institucionet e tjera. Kemi edhe mbështetjen e Policisë së Kosovës lidhur me këtë. Pra, edhe në pajisje logjistike“.