Daka: 15 500 zarfe nga diaspora dërgohen nesër në QNR

Kryetarja e KQZ-së, Valdete Daka, thotë se zarfet nga Serbia do të hetohen nga policia

Kryetarja e KQZ-së, Valdete Daka, ka bërë të ditur se rreth 15 mijë e 500 zarfe me vota nga diaspora do të dërgohen të hënën në Qendrën e Numërimit dhe të Rezultateve (QNR), dhe do të procedohen sipas rregullave, raporton Ekonomia Online.

Ndërsa, zarfet nga Serbia, nga të cilat dyshohet se u helmuan punonjës të KQZ-së, tashmë janë objekt i hetimeve nga policia.

Daka i bëri komentet pas mbledhjes së jashtëzakonshme të Komisionit Qendror të Zgjedhjeve (KQZ), të dielën në orët e mbrëmjes, lidhur me incidentin me zarfet e votave që erdhën nga Serbia.

Mbledhja është mbajtur me dyer të mbyllura, ndryshe nga zakonisht, raporton EO.

“Pas ngjarjes së sotme, KQZ-ja ka marrë vendim që votat nga diaspora, në përcjellje të policisë të transferohen në QNR dhe atje do të procedohen sipas procedurave të tjera. Janë rreth 15 mijë e 500 zarfe dhe do të dërgohen në QNR për rinumërim”, tha Daka.

“Zarfet të cilat kanë ardhur nga Serbia ka arsye të dyshohet se ka ndonjë materie dhe do të hetohen nga policia dhe të ekzaminohen nga forenzika për të konstatuar në qoftë se ka pasur ndonjë mjet helmues, dhe ende nuk dihet se a do të numërohen. Pasi të kryhen hetimet se a janë të rrezikshme, do të procedohen”, shtoi Daka.

“Kush do qoftë që e ka shkaktuar do të përgjigjet sipas Kodit Penal të Kosovës”, tha Daka, duke mos dashur të lëshohet nëkomentime “politike”.

“KQZ-ja vepron sipas ligjit dhe shërbimi i votuesve vendos se a janë të rregullt apo jo. Votuesve që iu refuzohet kanë të drejtë ankese”, përcjell Albinfo.ch.

---