Lehtësohet vrasja e ujqve

Qeveria ka vendosur që ujqit në të ardhmen të mund të vriten me më pak procedurë, në rrethana të caktuara

Loja “ngreh e mos këput” lidhur me lejen për të vrarë ujqët në Zvicër ka marrë një përfundim. Ajo po  zhvillohej një kohë të gjatë në mes të ithtarëve për vrasjen më të thjeshtësuar të ujqve dhe kundërshtarëve të vrasjes. Këshilli Federal ka dhënë një përgjigje të hënën.  Ky i fundit ka vendosur që ujqit në të ardhmen të mund të vriten me më pak procedurë, në rrethana të caktuara.
Krahas lehtësimit për gjuajtjen e ujqve, me vendimin e ri vihen në shënjestër edhe ujqët e rinj nga lavat e ujqve, kur ata u afrohen së tepërmi njerëzve dhe shtëpive të tyre ose kur tregojnë tepër pak frikë nga njerëzit. 

Por me gjithë këto lehtësime, qeveria këmbëngul se ujku vazhdon të konsiderohet kafshë e mbrojtur me ligj. Me këtë qëndrim, Berna zyrtare nuk ka mbështetjen e autoriteteve në Kantonin e Valisit, ku ballafaqimi i fshatarëve me ujqit është më i shpeshtë dhe më i ashpër. Ata do të dëshironin që gjuajtza e ujqve të lejohet gjatë gjithë vitit dhe pa kufizime.