Gjermania përfiton nga të huajt

Nga aspekti financiar Gjermania përfiton nga të huajt që qëndrojnë në vend, thotë një studim i realizuar nga Qendra për Kërkime Ekonomike Evropiane

Një studim i ri i Fondacionit Bertelsmann ka treguar se sistemi social në Gjermani ka pësuar rritje financiare për shkak të emigrantëve.
Siç raportojnë mediet gjermane 6.6 milion njerëz pa pasaportë gjermane kontribuan me 22 miliardë euro në sistemin social gjerman në vitin 2012. Pjesa më e madhe e studimeve bazohen në të dhënat e censusit, që regjistrojnë kombësinë, por nuk marrin parasysh prejardhjen e migracionit.

Ata të huaj, të cilët kanë një pasaportë gjermane dhe që në përgjithësi janë emigrantët më të suksesshëm janë lënë jashtë statistikave.
Studimi hedh poshtë supozimin se emigrantët janë një barrë për sistemin social gjerman. Sipas një sondazhi të kryer nga fondacioni, dy të tretat e gjermanëve mendojnë se emigrantët janë një barrë për Gjermaninë.

Fondacioni ka llogaritur gjithashtu se mesatarisht të huajt paguajnë 3000 euro më shumë në taksa dhe kontribute sociale në krahasim me atë që marrin në formën e benefiteve.
Studimi mund të lexohet edhe ndryshe. Numri i emigrantëve të papunë është tre herë më i lartë se i gjermanëve. Prandaj nevojitet më shumë punë në edukimin e brezit të dytë të emigrantëve. 40% e fëmijëve të emigrantëve marrin edukim më të lartë se prindërit e tyre, ndërkohë 60% të tjerë jo.

Nëse brezat e rinj të emigrantëve do të ishin integruar më mirë në tregun e punës, kontributi i tyre do të ishte katër herë më i madh.