Aktivistët klimatikë “pushtojnë” Parlamentin e Zvicrës

Aktivistët kanë shpalosur në tribunën e rezervuar për shikues një transparent të madh ku ishte e shkruar: “Final Countdown – Kanë mbetur 16 muaj”

Disa dhjetëra aktivistë të organizatës “Aktion Klimastreik” kanë befasuar në mëngjesin e të enjtes deputetët dhe personelin e Parlamentit Federal. Ata, me paraqitjen e tyre në tribunat e sallës së Dhomës Nacionale të Parlamentit të Zvicrës kanë penguar dhe ndërprerë për disa minuta debatin që po zhvillohej në sallë, shkruan srf.ch.

Aktivistët kanë shpalosur në tribunën e rezervuar për shikues një transparent të madh ku ishte e shkruar: “Final Countdown – Kanë mbetur 16 muaj”, transmeton albinfo.ch. Krahas kësaj, ata kanë kënduar një version të tyrin të këngës së njohur të partizanëve italianë “Bella Ciao”.

“16 muajt” nga teksti i transparentit i referohen afatit, sipas të cilit më së voni deri në fund të vitit 2020 duhet të reduktohet për 1.5% emetimi i CO2. Prandaj kanë mbetur vetëm edhe 16 muaj për t`i ndërmarrë masat e domosdoshme në këtë drejtim, thuhet në një komunikatë të bartësve të këtij aksioni.

---