Cyrihu, qyteti më i shtrenjtë në Evropë për të huajt

Pas Cyrihut vijnë dy qytete tjera zvicerane: Gjeneva dhe Berna. Në renditjen botërore Cyrihu figuron në vendin e pestë

Zvicra është dhe mbetet vend i shtrenjtë, sidomos për të huajt. Një studim i kohëve të fundit tregon se Cyrihu, Gjeneva dhe Berna janë qytetet më të shtrenjta për të huajt në Evropë.

Të huajt duhet të shikojnë thellë në xhepat e tyre nëse zgjedhin Cyrihun për të jetuar  aty. Pjesa rreth lumit Limmat e qytetit të Cyrihut sipas studimit është më e shtrenjta në Evropë për të huajt. Pas Cyrihut, në renditjen për vitin 2014 të bërë nga firma konsulente Mercer, vijnë qytetet zvicerane Gjeneva dhe Berna.  

Moska, e cila ende ishte në krye të listës vitin e kaluar ka përfunduar në vendin e katërt. Vijnë më pas Londra, Kopenhaga dhe Oslo.

Globalisht, si edhe vitin e kaluar, kryeqyteti i Angolës, Luanda mbetet qyteti më i shtrenjtë për të huajt. Cyrihu në renditjen ndërkombëtare figuron në vendin e pestë. 

“Mercer” krahason në studimin e realizuar në tremujorin e parë çmimet e produkteve dhe shërbimeve në më shumë se 200 qytete në mbarë botën. Përveç ushqimit dhe veshjeve gjithashtu ka hulumtuar edhe për çmimet e qirasë dhe biletave të transportit publik.

Rritja e çmimit të qirasë së banesave ka bërë që qytetet zvicerane të figurojnë në këtë renditje si më të shtrenjtat. Nga ana tjetër thuhet se frangu është një monedhë relativisht e fortë.