64 për qind të të punësuarve kanë shkelur rregullat e punës

Dy të tretat e të anketuarve pranojnë sjelljet e tyre të gabuara ndërsa 83% thonë se kanë qenë dëshmitarë të ndonjë parregullsie në punë

Dy në tre të punësuar në Zvicër pranojnë se së paku ndonjëherë i kanë bishtnuar punës ose kanë pasur sjellje jo të rregullt gjatë punës. Këtë e tregon një sondazh i realizuar në Zvicrën Gjermane nga ndërmarrja këshillëdhënëse KPMG. 36.4 për qind të të anketuarve kanë pranuar se kanë bërë shpërdorim dhe keqpërdorim të mjeteve të punës, që është shkelja më e shpeshtë e pranuar prej tyre.

64 për qind pranojnë sjelljet e tyre të gabuara ndërsa 83% prej të pyeturve thonë se gjatë 12 muajve të fundit kanë qenë dëshmitarë të ndonjë parregullsie në punë.

Një e katërta e 428 pjesëmarrësve në sondazh kanë pranuar se kanë rënë në konflikt interesi, duke favorizuar të afërmit ose miqtë apo duke vënë në plan të parë interesat private para atyre të punës, shkruan nzz.ch.

Afërsisht çdo i dhjeti i anketuar ka pranuar se ka shkelur detyrimin për ruajtjen e dokumenteve të firmës ndërsa 8.4 për qind i kanë bishtnuar sistemit të kontrollit në firmë.