Procedurat e shkurtuara të azilit rezultojnë të suksesshme

Me procedurën e shkurtuar është arritur të trajtohen më tepër lëndë ose kërkesa azili se që është pritur më parë, njofton Zyra Federale për Migracion (BFM)

Nga janari i këtij viti, një qendër federale azili në Cyrih, e hapur rishtas, ka shërbyer si qendër testuese për jetësimin e praktikës së re, të procedurave të shkurtuara të azilit. Pas pesë muaj funksionimi, autoritetet kanë ardhur në përfundimin se qendra ka qenë investim i qëlluar, respektivisht, testimi ka rezultuar i suksesshëm.

Madje, me procedurën e shkurtuar është arritur të trajtohen më tepër lëndë ose kërkesa azili se që është pritur më parë, njofton Zyra Federale për Migracion (BFM).

Praktika e re ka treguar se vendimet e shkallës së parë atakohen më rrallë se sa në procedurat e rregullta. Një rol të rëndësishëm në këtë sukses luan fakti se azilkërkuesit në këtë qendër që nga fillimi përcillen nga këshilltarë juridikë, të cilët janë të informuar mirë lidhur me hapat konkretë proceduralë, përfundon BFM.

Faza testuese në qendrën e re federale të azilit në Cyrih do të vazhdojë deri në fund të muajit shtator të vitit 2015.