Shoqëria Civile: Procesi i përzgjedhjes së noterëve ka shkelje serioze

Shoqëria Civile në Kosovë ka shprehur shqetësimin lidhur me mbarëvajtjen e fazës së parë të provimit të noterisë.
Instituti Colombus, Organizata Çohu, Instituti i Kosovës për Drejtësi, Lëvizja FOL dhe Grupi për Studime Juridike dhe Politike konsiderojnë si skandaloz faktin që një numër i madh i kandidatëve, të cilët kanë kaluar fazën e parë të procesit përzgjedhës për Noter, fazën e testimit me shkrim, janë në lidhje të drejtpërdrejtë familjare, politike e miqësore me anëtarët e komisionit dhe partinë politike që menaxhon Ministrinë e Drejtësisë, transmeton albinfo.ch.
“Lejimi që një praktike e tillë të shndërrohet në normalitet mbetet e rrezikshme dhe humb besimin që pushteti publik, i cili u është besuar noterëve, do të ushtrohet në mënyrë profesionale. Për ne mbetet e papranueshme që nepotizmi, lidhjet shoqërore, miqësore dhe politike të shndërrohen në standarde, të cilat janë të domosdoshme për të qenë të suksesshëm në këtë proces përzgjedhës”, theksohet në reagim.
Organizatat në fjalë kërkojnë nga Ministria e Drejtësisë që këtë proces ta kthejë në pikën zero, ndërsa procesi i ri për përzgjedhjen e kandidatëve të monitorohet nga institucionet ndërkombëtare dhe Organizatat e Shoqërisë Civile.