7 nga 10 zviceranë merren me sport

71 % e zviceranëve gjermanofonë merren së paku një ditë në javë me sport. Te frankofonët kjo përqindje është 64% ndërsa te italishtfolësit, 56%

Shumica dërmuese e zviceranëve, kohën e tyre të lirë e shfrytëzojnë duke u marrë e ndonjë sport. Siç tregon një studim i kryer në nivel të vendit, 69 për qind e qytetarëve të moshave 15 deri 74 vjeçarejanë së paku një herë në javë aktiv në ndonjë sport. Kjo përqindje është për 6 % më e lartë se para 14 viteve, gjë që dëshmon se sporti ndër zviceranët është vërtetë në trend.

Por, nuk janë të gjithë zviceranët njësoj aktivë. Përderisa zviceranët e zonës gjermanishtfolëse janë sportistët më të përkushtuar, italishtfolësit (kantoni i Tesinës) sipas këtij studimi dalin më dembelët. 71 % e zviceranëve gjermanofonë merren së paku një ditë në javë me sport. Te frankofonët kjo përqindje është 64% ndërsa te italishtfolësit, 56%.

Po ashtu studimi ka nxjerrë në pah se për ndryshim nga kohët e mëhershme, sot femrat bëjnë sport afërisht sa edhe meshkujt.

Një tregues që nuk ka pësuar ndryshim në këto 14 vitet e fundit është ai i josportistëve. Njësoj sikur atëherë, edhe tash 25 për qind të të anketuarve janë përgjigjur se kurrë nuk kanë ushtruar ndonjë sport.

Ndër sportet më të dashura për zviceranët  rezultojnë ngasja e biçikletës, noti, skitaria dhe alpinizmi.

Një studim i tillë për herë të parë është bërë në vitin 2000, pastaj edhe një herë në vitin 2008. Për studimin e vitit 2014 janë përdorur të dhënat e 10 mijë të anketuarve.