Situatë e rëndë në Shqipëri, në Shkodër mund të ketë tensione

Pavarësisht tensioneve në rritje, që kulmuan me djegien e shumë qendrave të Komisioneve Zonale të Administrimit të Zgjedhjeve, kryeministri Edi Rama, nga foltorja e Kuvendit, ka thënë se më 30 qershor zgjedhjet do të zhvillohen.
Rama kritikoi presidentin Ilir Meta për veprimet e tij, duke thënë se ai po i hedh benzinë zjarrit, transmeton albinfo.ch.
Ndërsa, ambasadori i Austrisë, Johan Sattler, nga Shkodra, tha se Shqipëria është në një krizë më të madhe se zakonisht dhe shtoi se ka ardhur koha që palët të ulen për ta zgjidhur atë.

Thirrje për qetësi u ka bërë palëve edhe një herë Presidenti Ilir Meta.
Ai ka thënë se nuk është koha për të treguar kush është më i fortë dhe as retorikë përçarëse.
“Sërish insistoj me forcë rëndësinë e dialogut mes palëve, e njëkohësisht gatishmërinë time për të kontribuar për një zgjidhje sa më të shpejtë”, ka thënë Meta.
Ndërsa Partia Socialiste duket e palëkundur se zgjedhjet do të zhvillohen, pasi nuk ka anuluar tubimin e sotëm në Shkodër, edhe pse ishte njoftuar nga komuna se nuk ka shesh të lirë për këtë tubim.
Nisja e kryeministrit Rama për në Shkodër ka bërë që pjesëtarë të opozitës të bllokojnë rrugën në Lezhë, e po ashtu ka pasur forca të shtuara të policisë në qytetin e Shkodrës.
Po në të njëjten kohë kur është parë tubimi i Partisë Socialiste, një kundërtubim ka thirrur edhe Partia Demokratike, gjë që mund të sjellë tensione më të mëdha.
Opozita po ashtu ka paralajmëruar për nesër në mbrëmje protestën e radhës në Tiranë.