Qytetarët e mirëpresin linjën Prishtinë-Aeroport

Nga fillimi i këtij muaji ka nisur linja e rregullt e transportit publik Prishtinë-Aeroport

Aeroportit Ndërkombëtar të Prishtinës “Adem Jashari”, për shumë vite i ka munguar transporti publik. Udhëtarët të cilët dikur paguanin shuma bukur të mëdha për të shkuar në aeroport, tash e tutje kanë mundësi që të udhëtojnë me autobus urban.

Nga ky muaj, Komuna e Prishtinës ka bërë zgjidhje duke lëshuar linjën e rregullt Prishtinë-Aeroport, e cila qarkullon çdo orë, duke filluar nga ora tre e mëngjesit deri në njëzetenjë të mbrëmjes.

Nga fillimi i këtij muaji ka nisur linja e rregullt e transportit publik Prishtinë-Aeroport. Lulzim Rexhepaj, kryeshef Ekzekutiv i “Trafikut Urban”, tha për Radio Kosovën se presioni për hapjen e kësaj linje ka qenë mjaft i madh. “Fillimisht kemi menduar se nuk do te këtë shumë udhëtarë, por informacionet e para flasin se qytetarët e kanë mirëpritur dhe po e përdorin këtë linjë”, është shprehur Rexhepaj, përcjell albinfo.ch.

Nisjet e para janë në orën tre të mëngjesit, nga stacioni i autobusëve në Prishtinë, ku më pas autobusi kalon nga qendra në pjesën kah Hoteli “Grand”, “Pallati i Rinisë”, për kaluar në Rrugën “Bill Clinton”, dhe ndalja e radhës do të jete te rrethi në Fushë Kosovë për të vazhduar në aeroport.

Qytetarja Antigona Gashi, e cila po udhëtonte me autobus nga Prishtina për në aeroport, thotë se kjo linjë e autobusit është një lehtësim për ta, pasi që më herët kanë udhëtuar me taksi dhe kanë shpenzuar më shumë.

“Po udhëtoj për aeroport. Jam duke shkuar për ta  pritur vëllanë. Sot është hera e parë që po udhëtoj me autobus. Veç e mora orarin dhe pas një ore kthehemi prapë me autobus. Shumë lehtësim me autobus. Më herët më është dashur të paguaj taksi për të shkuar në aeroport, sepse autobusë s’ka pasur dhe kam shpenzuar më shume për taksi”.

Bileta për qytetarët që shfrytëzojnë autobusin për në aeroport është tri euro, kurse për punëtorët e aeroportit është një euro.

---