“Pavijoni i verdhë”, një zë për rikthimin e hapësirave publike në Prishtinë

Albinfo.ch

Me qëllim që të inkurajojë rikthimin e hapësirave publike te qytetarët, në rrugën “Rexhep Luci” në Prishtinë gjatë ditës së djeshme është vendosur intervenimi urban “Pavijoni i verdhë”, shkruan albinfo.ch.

Siç duket, ky pavijon ka ringjallur një hapësirë publike të munguar për banorët e kryeqytetit. Disa fëmijë kanë zgjedhur luhajat për argëtim, të tjerë fushën e improvizuar të basketbollit, e ca të tjerë kanë zgjedhur të ulen e të pushojnë në këtë pavijon.

Disa qytetarë, për albinfo.ch janë shprehur të lumtur për këtë intervenim dhe kanë thënë se do të donin që të qëndronte më gjatë.

Kurse nga Qendra Multimedia kanë njoftuar se gjatë javës në këtë pavijon do të kenë vend aktivitete të ndryshme.

Ky projekt përkrahet nga programi Kultura për Ndryshim që financohet e menaxhohet nga Bashkimi Evropian, ndërsa implementohet nga Qendra Multimedia e Goethe Institut.