Kosova, me shkallën më të lartë të refuzimit të vizave

Institutit EPIK ka bërë publike të dhënat e studimit të fundit për migrimin e kosovarëve dhe marrjen e azilit në vendet e BE-së.

Në këtë raport theksohet se në periudhën 2014-2018, gjithsej 413,569 qytetarë të Kosovës kanë aplikuar për vizë Shengen në vendet e BE-së dhe nga ta 281,826 kanë marrë vizë Shengen, transmeton albnifo.ch.

Vetëm në vitin 2018, gjithsej 90,840 qytetarë të Kosovës kanë aplikuar për vizë Shengen, ndërsa 63,424 kanë marrë vizë Shengen.

“Shkalla e refuzimit të vizave ishte 21.6%. Në vitin 2018, shkalla e refuzimit të kërkesave të qytetarëve të Kosovës për pajisje me vizë Shengen është përkeqësuar krahasuar me vitin 2017, nga 19.6% (2017) në 21.6% (2018).

Në vitin 2018, më së shumti aplikacione për vizë janë bërë në Gjermani me 32,529 aplikacione, nga cilat u miratuan 25,058, Zvicër me 30,712 aplikacione, nga cilat u miratuan 24,504 dhe Greqi me 6,922 aplikacione, nga cilat u miratuan 6,03”, thuhet në të dhënat e këtij hulumtimi.

Në vitin 2018 Kosova ishte në vendin 39 nga të gjitha vendet e botës për nga shkalla e refuzimit të vizave për vizë Shengen.

Kosova ishte e ranguar më dobët se sa Egjipti, Guinea-Bissau, Burkina Faso apo Palestina, të cilët kanë pasur shkallë më të ulët të refuzimit të vizave se Kosova në vitin 2018.