Detyra e kosovarit Dorlir Ahmeti, në Olimpiadën Ballkanike të Matematikës

Shoqata Shqiptare e Matematikës njofton se ushtrimi i parë në tezën e Olimpiadës së 36-të Ballkanike të Matematikës, BMO 2019, që po zhvillohet ne Chisinau të  Moldavisë, është propozuar nga ekipi shqiptar me autor Dorlir Ahmetin, transmeton albinfo.ch.

Shoqata Shqiptare e Matematikës falënderon Ahmetin për kontributin e çmuar të dhënë në punën me nxënësit e talentuar në matematikë në Shqipëri dhe Kosovë në katër vjetët e fundit.

Kjo shoqatë uron që arritjet e Dorlir Ahmetit të jenë burim frymëzimi për brezin e ri të matematikanëve shqiptarë që të jenë sa më të suksesshëm.

Dorlir Ahmeti është autor i Ushtrimit të famshëm 5 në IMO 2015 dhe në vitin 2017 ka qenë me një detyrë në gara ballkanike BMO si dhe një detyrë në gara ballkanike për të rinj JBMO.