Deputetët kosovarë vlerësojnë kontributin e arbëreshëve të Italisë

Kuvendi i Kosovës ka mbajtur një seancë solemne me rastin e “Ditëve të Arbëreshëve në Kosovë”, ku edhe kanë pritur një grup nga ky komunitet që po viziton Kosovën, transmeton albinfo.ch.

Ky aktivitet kulturor është organizuar nga Ministria e Diasporës dhe Investimeve Strategjike, nën patronazhin e Kryeministrit. Deputetët vlerësuan lart kontributi e arbëreshëve për ruajtjen e traditës, kulturës dhe gjuhës shqipe.

Ministri i Diasporës, Dardan Gashi, tha se ndjehet i lumtur për ardhjen e arbëreshëve në Kosovë, duke thënë se këta janë shembujt më të mirë që askush nuk mund t’i pushtojë shqiptarët për t’i humbur gjurmët e tyre.

Përfaqësuesi i arbëreshëve, Rosario Petta, deklaroi se arbëreshët nuk janë popull që dorëzohet lehtë e që gjunjëzohet para vështirësive, edhe pas 530 vjetëve e flasim gjuhën shqipe. “Italia dhe Kosova janë largë, por ne e ndiejmë veten atje si në shtëpinë tonë”, deklaroi Petta.

Edhe kryeministri Ramush Haradinaj ka organizuar pritje solemne për delegacionin e komunave të arbëreshëve të Italisë.