Protesta e SLS-së shkakton tollovi në Merdare

Pritje të gjata janë shkaktuar në pikën kufitare të Merdares pas kalimit të anëtarëve të SLS-së, të cilët e kanë kaluar atë në shenjë proteste për ndalimin e zyrtarëve të kësaj partie. 

Kreu i partisë së Pavarur Liberale Serbe, Sllobodan Petroviq, ka thënë se kjo protestë po bëhet pasi autoritetet serbe dje kanë ndaluar Srgjan Jovanoviqin, anëtar i bordit të partisë së tij dhe këshilltar i kryeministrit të Kosovës, Ramush Haradinaj, përcjell albinfo.ch.

Srgjan Jovanoviq, i cili ishte ndaluar një ditë më parë, ka thënë se pyetjet kanë qenë të njëjta nga policia, ‘pse jeni pjesë e Qeverisë së Kosovës, përse bashkëpunoni me ta, si dhe përse nuk bëheni pjesë e Listës Serbe”.  Edhe Sllobodan Petroviqi ka kërkuar që të ndalen këto veprime, siç i ka quajtur ai, tortura ndaj pjesëtarëve të SLS-së.

Ndërsa, kryeministri Haradinaj ka thënë se janë të papranueshme ndalesat e zyrtarëve serbë, të cilët punojnë në institucionet e Kosovës, nga institucionet e Serbisë. Ai ka paralajmëruar edhe kundër-masa në raport me zyrtarët serbë, të cilët vizitojnë Kosovën.