Gani Hasani, kosovari që po vlerësohet si hero nga gjermanët

Gani Hasani (Facebook)

10 prillin, Gani Hasani nga Likoshani i Drenasit, thotë se nuk do ta harrojë kurrë.

Në këtë datë ai e shpëtoi nga djegia trupin e një 28-vjeçari gjerman, vetura e të cilit kishte marrë flakë, pasi ishte aksidentuar në qytetin Anzing të Gjermanisë, përcjell albinfo.ch.

 Shqiptari nga Kosova që jeton në Gjermani, po vlerësohet si hero nga gjermanët. Ai ka rrëfyer për KTV-në se si e shpëtoi nga djegia, trupin e 28-vjeçarit, vetura e të cilit ishte kapluar nga flakët kur ishte aksidentuar në një urë.

I aksidentuari ka vdekur, por gjermanët po e vlerësojnë Hasanin si hero për gjestin e bërë. Hasani thotë se pamjet e tmerrshme që pa, nuk do t’i largohen asnjëherë nga koka. Ai thotë se po merr falënderime të shumta për humanizmin e treguar, edhe pse nuk arriti që t’ia shpëtonte jetën të aksidentuarit.

Hasani tregon se është propozuar që të jetë pjesë e listës së medaljeve që kryetari i Bayernit ndan çdo fundvit për njerëzit me kontribut të veçantë.