Protestojnë stomatologët në Kosovë, kërkojnë vende pune

Foto ilustrim

 Ka më shumë se dy vjet që një grup i specialistëve të Stomatologjisë po kërkojnë që t’u sigurohet një vend pune nga Ministria e Shëndetësisë.

Ata këtë të premte kanë protestuar sërish para Ministrisë së Shëndetësisë, përcjell albinfo.ch.

Mirjeta Berisha, specialiste e stomatologjisë, ka kërkuar nga ministri që të bëjë ndryshime në Udhëzimin administrativ, i cili sipas saj, nuk ua lejon punësimin në QKMF, dhe në këtë mënyrë të zgjidhet problemi i tyre. 

“Sot është mbledhja finale e grupit punues të plotësim-ndryshimit të Udhëzimit administrativ. Ne presim rezultat, kërkojmë nga ministri që në bazë të premtimeve që ka dhënë, ta bëjë këtë ndryshim dhe të zgjidhet problematika jonë”, ka thënë Berisha. 

Sipas saj, numri i specialistëve të papunë ka qenë 130, por ai po rritet vazhdimisht.

Ndërsa, Faik Hoti nga Ministria e Shëndetësisë, ka premtuar zgjidhje të shpejtë.