Mbi 60 000 policë ‘blindojnë’ Francën për protestën e radhës

(AP Photo/Claude Paris)

Më shumë se 60 000 policë dhe forca të xhandarmërisë në Francë janë mobilizuar për të shtunën e 23-të të protestës së jelekverdhëve, njofti ministri i Brendshëm francez, Christophe Castaner.

Shefi i policisë, Didier Lallement, konfirmoi se tubimet e jelekverdhëve në afërsi të Notrë Damit ishin një provokim i pastër.

‘’Mbi 60.000 policë dhe xhandarë do të mobilizohen në gjithë Francën për të kryer detyrën e tyre. Misioni ynë është siguria e francezëve dhe garantimi i të drejtës për të protestuar pa rrezik’’, bëri të ditur gjatë një konference shtypi Castaner.

Sipas tij, huliganët do të jenë sërish të pranishëm nesër në disa qytete të Francës, në Tuluz, në Montpelie, Bordo dhe në zona të veçanta në Paris.

‘’Objektivi i tyre është i qartë, një skenar i dytë si ai i 16 marsit’’, vijoi ministri, referuar veprimit të 20 jelekverdhëve, ku Elizeja u bë shënjestër e dhunës dhe skenave kaotike, që çuan në shkarkimin e shefit të policisë së Parisit.