Kërcënon ambasadori amerikan në Kosovë, thotë se “Durimi ynë ka kufi”

Ambasadori amerikan në Kosovë, Philip Kosnett, ka deklaruar se SHBA-ja është e përkushtuar në ofrimin e mbështetjes së dialogut Kosovë-Serbi. 

Kosnetti, në një  intervistë për “Radio Kontakt Plus”, ka thënë se durimi i SHBA-së ka gjithmonë kufi dhe se nuk mund të garantojë që Washingtoni edhe në të ardhmen do të jetë po kaq i përkushtuar nëse qeveritë e dy vendeve dëshirojnë të ecin përpara. 

“Durimi ynë ka gjithmonë kufi. Një gjë që ua kemi thënë dy qeverive, në Kosovë dhe në Serbi, është se SHBA-ja i përkushtohet ofrimit të përkrahjes në proces. Presidenti Trump, siç e dini, u ka shkruar letra presidentit Thaçi dhe presidentit Vuçiq se SHBA-ja është krejtësisht e përkushtuar ndaj këtij procesi”, ka thënë Kosnetti, përcjell albinfo.ch.

Duke folur për taksën e Kosovës vënë ndaj mallrave të Serbisë e të Bosnjë e Hercegovinës, ai ka thënë se Qeveria amerikane edhe më tej beson se heqja e taksës është një hap i rëndësishëm që dialogu sërish të vazhdojë.