Shqiptarit dhe libanezit, burg të përjetshëm për vrasje të rëndë

Shqiptari nga Kosova B., e ka ndihmuar shokun e tij libanez, për të kryer vrasjen, duke e joshur viktimën dhe duke siguruar revolen me të cilën është bërë vrasja

Gjykata e Landit në Damstadt u ka shqiptuar dënimin maksimal, me burg të përjetshëm dy peronave, një shqiptari 22 dhe një libanezi 31 vjeçar për vrasjen e një libanezi tjetër, 56 vjeçar. Te rasti i 31 vjeçarit është konstatuar peshë më e madhe e përgjegjësisë. Për këtë arsye atij, me vendimin gjyqësor i përjashtohet mundësia e lirimit të parakohshëm nga burgu, pas 15 vitesh, praktikë kjo që është e zakonshme në burgjet gjermane.

Shqiptari B., i dënuar për vrasje, gjatë gjithë kohës ka kundërshtuar akuzën, duke thënë se nuk ka ditur asgjë për planifikimin e vrasjes. Mirëpo, siç shkruajnë gazetat gjermane duke iu referuar vendimit gjyqësor, indiciet tregojnë për përfshirjen edhe të tij në vrasje. Më tutje kryetari i trupit gjykues ka folur për një vrasje të planifikuar me gjakftohtësi. Me këtë rast ai ka theksuar se për këtë flet edhe preciziteti i vrasjes me shtatë plumba në kurriz.

Një ekspertizë e bërë nga Enti i Kriminalistikës në Wiesbaden që i ka bërë xhaketës së shqiptarit, ka sjellë dëshmi interesante në fillim të seancës gjyqësore. Aty janë gjetur fibra të një mjeti kozmetik që përdorte 31 vjeçari për flokët e tij. Dhe po këto fibra janë gjetur edhe në ulësen e mbrapme të një veture, të cilën e kanë vozitur të dy të dënuarit më 26 prill viktimën e mëvonshme.

Motivi i vrasjes është, siç ka konstatuar trupi gjyqësor, lakmia materiale e libanezit 31 vjeçar, (O.) i cili kishte biznese të përbashkëta në shitje të veturave me viktimën 56 vjeçar (R.). Nga ky bashkëpunim O. I kishte shumë borxhe viktimës së ardhshme të tij, shkruan wnoz.de.

Ndërsa shqiptari nga Kosova B., e ka ndihmuar me të madhe shokun e tij libanez, për të realizuar vrasjen. Veç tjerash, ka qenë ai që e ka thirrur atë me pretekstin se gjoja ishte i interesuar ta blinte makinën e tij. Ai po ashtu, sipas tekstit të vendimit gjyqësor, e ka siguruar revolen me të cilën është kryer vrasja.