Zelanda e Re do të ndalojë disa lloje të armëve

Zelanda e Re do të ndalojë të gjitha llojet e armëve gjysmautomatike dhe pushkët me shënjestrim pas sulmeve në Kristçërç, tha kryeministrja e Zelandës së Re, Jacinda Ardern.

Njoftimi vjen disa ditë pasi një sulmues i armatosur vrau 50 persona në dy xhami të Kristçërç.

“Historia jonë ka ndryshuar. Tashmë duhet edhe ligjet tona po ashtu”, tha kryeministrja Ardern, e cila pret që legjislacioni i ri të vendoset më 11 prill.

Ndërkohë një amnisti është shpallur për personat që i posedojnë këto armë. Ata mund t’i dorëzojnë ato tek autoritetet në këmbim të kompensimi material. Kryeministrja e Zelandës së Re tha se kjo skemë e kompensimit do t’i kushtojë vendit rreth 138 milionë dollarë.

“Ky është çmimi që duhet të paguajmë për të siguruar komunitetet e vendit”, tha zonja Ardern.

Policia ka njoftuar se të gjitha viktimat e sulmit terrorist tashmë janë identifikuar, shkruan rel, përcjell albinfo.ch.

Australiani Brenton Tarrant, 28 vjeç, i vetëpërshkruar si supremacist i bardhë, u akuzua për vrasje.

Në mesin e 50 personave të vrarë në dy xhami, gjatë faljes së xhumasë, ishin migrantë myslimanë, refugjatë dhe banorë nga Pakistani, Afganistani, Bangladeshi, India, Turqia, Kuvajti dhe Somalia.