Kryeministri i Kosovës: Kosova nuk jep tokë për njohje

Kryeministri i Kosovës, Ramush Haradinaj, i ka quajtur spekulime pohimet e medias gjermane “Frankfurter Rundschau”, se ndarja ndërmjet Kosovës dhe Serbisë në vija etnike është marrëveshje e përkrahur nga Shtetet e Bashkuara të Amerikës dhe Bashkimi Evropian. Ai me këtë rast tha prerazi se nuk ka eksperimente me kufijtë e Kosovës dhe paralajmëroi se nëse ndodh një gjë e tillë, atëherë do të ketë ndjekje penale për të gjithë ata që e shkelin Kushtetutën.

“I kam parë këta artikuj, janë disa, do të thotë, mua më pëlqej artikulli tjetër, deklarimi i ministrit Heiko Mass, që Kosova i ka kryer reformat, ato janë të respektohen, nuk mendoj që artikujt e tjerë kanë peshë. Pra, nuk janë të peshës që ne duhet t’ i marrim seriozisht…Nuk bëhen këso eksperimentesh me Kosovën, duhet ta kuptoni këtë, nuk do të ketë eksperimente të tilla me kufi e as me territore, nuk ka eksperimente. Kosova është një, është e 17 shkurtit. 

Kushtetuta jonë vetëm një Kosovë e njeh, kushdo tjetër që e diskuton, janë duke bërë shkelje të Kushtetutës edhe ligjore, edhe ata do të ndiqen penalisht”, ka deklaruar Haradinaj.

Haradinaj gjithashtu bëri të qartë se kufijtë aktual të Kosovës nuk mund të ndryshojnë dhe se çdo gjë tjetër për ndryshimin e tyre është vetëm spekulim, shkruan mediat kosovare, përcjell albinfo.ch

“Kosova ka kufij me Serbinë, me tërë gjatësinë kufitare, ruhet kufiri në të dyja anët. Në njërën anë nga Policia e Kosovës në anën tjetër nga ana e Serbisë. NATO e di këtë kufi është i shënuar, është kufiri administrativ i dikurshëm i ish-Jugosllavisë, kushtetuta e ish-Jugosllavisë se kufijtë e republikave nuk mund të ndryshohen pa dakordimin e dy palëve, në rrafshin e krahinave e po ashtu pa aprovimin e Parlamentit. Kufiri administrativ Kosovë-Serbi, është po ai kufi në të cilat e ka marrë përgjegjësinë NATO, në vitin 99, e të cilin e kemi trashëguar me deklarimin tonë shtet i pavarur, sovran…Bazuar në këto, të gjitha të tjerat janë spekulime ”, ka thënë Haradinaj.

Ndërkohë që është përfolur se marrëveshja ndërmjet Kosovës dhe Serbisë do të nënshkruhet në qershor, Haradinaj pohon se një marrëveshje do të jetë e mundshme, por pa i ndryshuar kufijtë aktualë.

“Çdo herë është e mundur një marrëveshje, por jo marrëveshje që ndryshon kufijtë ekzistues, pa Republikën Serbe në Kosovë”, ka thënë ai.