Erëra të forta në Kosovë, shkaktojnë probleme

Erërat e forta gjatë mbrëmjes kanë shkaktuar dëme në rajonin e Prishtinës dhe atë kryesisht në përçues elektrikë. 

Sipas të dhënave të Qendrës Emergjente, në fshatin Surkish ka pasur këputje të përçuesit elektrik.

Në Llapashticë të Podujevës erërat kanë shkaktuar zjarr në një shtëpi. Përçuesit elektrikë janë këputur edhe në disa fshatra të Drenasit dhe Graçanicës. Erërat, dëme në shtylla elektrike kanë shkaktuar edhe në Istog.

Zëdhënësi i KEDS-it, Viktor Buzhala, ka thënë se ekipet janë duke punuar në sanim të dëmeve.

“Kemi dhjetëra shtylla elektrike të rrëzuara nga erërat dhe përçues të këputur. Gjendja më e keqe është në rajon të Pejës, ku kemi pasur 8 prishje. Ekipet i kemi në teren dhe po sanojnë dëmet në kohën më të shkurtë të mundshme. Në regjionin e Prishtinës kemi 4 prishje”, ka deklaruar Buzhala.