Migrantët votojnë për herë të parë në Gjermani

Tre milionë gjermanë votojnë me 22 shtator për herë të parë në Gjermani. Në mesin e tyre edhe migrantë, të cilët kanë marrë nënshtetësinë gjermane në katër vitet e fundit

Tema e emigracionit mund të fitojë peshë në vitet e ardhshme, sepse tregu gjerman i punës ka nevojë urgjente për punonjës të kualifikuar nga jashtë. Që sot ata përbëjnë 10% të zgjedhësve potencialë. Sikur të gjithëmigrantët me të drejtë vote, nga mosha 18 vjeç, të merrnin pasaportën gjermane, ata do të përbënin madje 20% të personave me të drejtë vote në popullsinë gjermane.

Shumica e emigrantëve janë me prejardhje turke. Ata janë pasardhësit e punëtoreve emigrantë turq. Por shumë prej tyre hezitojnë, sepse si jo qytetarë të BE-së u duhet të dorëzojnë pasaportën e tyre të parë dhe në këtë mënyrë do të humbasin dokumentin më të rëndësishëm të identitetit të tyre. Kancelarja Angela Merkel (CDU) e refuzon nënshtetësinë e dyfishtë.

Cem Tekin, vitin e kaluar vendosi megjithatë të merrte nënshtetësinë gjermane, edhe pse si aktor, regjisor dhe drejtor artistik ai udhëton vazhdimisht mes Gjermanisë dhe Turqisë. Cem Tekin, i lindur para 31 vjetësh në Ankara, ishte katër vjeç, kur erdhi me prindërit në Gjermani.

Ai nuk e ka patur kurrë ndjenjën se është i huaj, apo se është trajtuar si i tillë.

 “Është një certifikatë, që të thotë: “Okay”, tani edhe ti bën pjesë, je gjerman, dhe të lejohet pjesëmarrja në politikë“, thotë Tekin. Synimi i tij politik është promovimi i kulturës. Gjermania është një komb i madh që e do kulturën dhe ka shumë krijues, thotë ai në bisedë me DW. Edhe pse ekzistojnë shumë mundësi për të bërë kërkesa për financime, në të njëjtën kohë në këtë sektor bëhen vazhdimisht kursime. „Është për të ardhur keq, sepse kjo është fusha, ku njerëzit mund të realizojnë me lehtësi diçka së bashku dhe kështu arrihet integrimi.“

Por në programin elektoral të partive kultura nuk luan rol.

Dennis Spies, politolog në universitetin e Këlnit, ka analizuar, sjelljen e asaj pjese të elektoratit, që ka marrë së voni nënshtetësinë gjermane, në bazë të kritereve të moshës dhe prejardhjes. Prognoza e tij është: „Po të marrim parasysh gjininë, arsimimin e tyre në Gjermani, socializmin e tyre, ndikimin nga shtëpia e prindërve, atëherë sipas statistikave ata votojnë me probabilitetin më të madh ose për socialdemokratët, ose për ekologjistët. „Shumë pak gjasa ka që të votojnë për të kristiandemokratët, apo për liberalët“, mendon Spies.

Anita Martinez Amor nuk e di ende, se për kë do të votojë. Ajo e di, se me votën e saj do që të kontribuojë për një politikë më solidare në Evropë. Ajo ka lindur në Spanjë dhe para dhjetë vjetësh erdhi në Gjermani për hir të dashurisë. Tani së fundi ajo ka marrë nënshtetësinë gjermane. Papunësia e lartë dhe politika e vazhdueshme e kursimeve në Spanjë janë shpesh temë e bisedave me familjen e saj dhe me miqtë dhe shokët në Këln.

„Por Evropa luan një rol dytësor në fushatë”, thotë Thomas Traguth, politolog në universitetin e Këlnit, në bisedë me DW, “sepse zgjidhja e problemeve aktuale dhe konvergjenca në Evropë do kohë dhe nuk është temë e përshtatshme për fushatë zgjedhore”. Traguth thekson se kursimet do të vazhdojnë të jenë në agjendën politike të kristiandemokratëve CDU, kristiansocialëve CSU dhe të liberalëve FDP.

“Socialdemokratët, të majtët si dhe ekologjistët janë me siguri për më pak kursime.“ A ia bën vallë ky konstatim më të lehtë Anitës se për kë do të votojë?

/DW/