Tre kosovarë i vënë zjarrin picerisë, me urdhrin e shefit

Tre të akuzuarit janë dënuar me nga 18 respektivisht 16 muaj burg për zjarrvënie dhe për mashtrim të sigurimeve

Ka përfunduar procesi i gjykimit të tre shqiptarëve nga Kosova për akzuar për zjarrvënien në picerinë “Was ist mit du” në Wörgl të Austrisë. Ata janë dënuar me nga 18 respektivisht 16 muaj heqje lirie, shkruan krone.at., për zjarrvënie dhe për mashtrim të sigurimeve.

Të tre të dënuarit ishin me qëndrim në Gjermani dhe kanë pohuar se kanë pranuar të venë zjarrin, pasi që u janë premtuar nga 5.000 dei në 10.000 euro për këtë veprim.

Njëri nga zjarrvënësit ka pësuar lëndime të rënda gjatë vënies së zjarrit.

Dënimi ende nuk është i plotfuqishëm.

Për udhëheqësen e picerisë, një grua 31 vjeçe, nuk është marrë asnjë vendim. Lënda e saj është ndarë, pasi që ajo lidhet me pronarin e picerisë, i cili aktualisht gjendet në arrati.

———————

Në një piceri në Wörgl të Austrisë kishte shpërthyer një zjarr më 2 shkurt të këtij viti. Kaq muaj pas zjarrit, tre kosovarë që ndodhen në bankat e  të akuzuarve kanë pranuar se ata kanë qenë zjarrvënësit. Por, ata po ashtu kanë fajësuar shefin e picerisë, se ai i ka yshtur ata për ta bërë këtë veprim.

Ndërkohë shefi është arratisur dhe mendohet se mund të jetë duke qëndruar në Kosovë, shkruan orf.at.

Një grua e cila e ka udhëhequr restorantin, e mohon në mënyrë kategorike çdo përfshirje të saj në zjarrvënie. Ajo mendohet të ketë qenë dashnorja e shefit të lokalit. Kjo, përkundër faktit se ajo vetë, ashtu sikurse lokali, ka pasur disa borxhe, për çfarë në lokal ishin dukur shpesh të hynin e të dilnin ekzekutorët e borxheve.

Kjo rrethanë kishte shtyrë prokurorinë që të padiste të katër vetat për zjarrvënie të qëllimtë, për të përfituar nga sigurimi i lokalit.

Pasi kanë pranuar veprën, tre meshkujt e akuzuar mund të presin dënime më të buta. Ndërsa mbetet të shihet sonte, në fund të seancës, nëse trupi gjykues do t`i besojë pohimeve të gruas se nuk ka qenë e përfshirë në zjarrvënie.

Duhet përmendur se, duke konsideruar se zjarrvënia ishte vepër e ekstremistëve të djathtë, një grup të huajsh dhe përkrahësish të tyre më 9 shkurt patën zhvilluar një protestë para lokalit të djegur.