Në Kubë rrëzohet një meteor

Një meteor ka rënë me zhurmë të madhe në perëndim të ishullit, pa shkaktuar ndonjë dëm të madh, shkruajnë mediat e huaja, informon Albinfo.ch.

Në Kubë, të premten ka rënë një meteor, duke shkaktuar një shpërthim të zhurmshëm në disa lokalitete në provincën e Pinar del Rio (perëndim), tha një anëtar i institutit kombëtar të astronomisë.

Shumë shtetas kubanë nëpër rrjetet sociale kanë shpërndarë imazhe dhe video të rënies së meteorit, rreth orës 14:00 të kohës lokale (18:00 në Zvicër), të shoqëruar nga një ndriçim, informon Albinfo.ch. Gazetarët nga televizionet lokale kanë publikuar fotot e pjesëve të zeza të meteorit, që ranë në qytetin turistik të Vinales.

Të habitur, banorët kanë dalë në rrugë, dëshmoi nënkryetari i bordit të administratës së Vinales, Osmany Moseguí, duke deklaruar se nuk është regjistruar asnjë i plagosur, informon Albinfo.ch. “Gurët kanë rënë”, shtoi ai, “më i madhi prej tyre rreth 20 – 30 centimetra” – “duke lënë gjurmë të rënies së tij” në një rrugë që çonte në një atraksion turistik të qytetit”, shtoi ai.

Përveç Vinales, shpërthimi është dëgjuar edhe në qytetet e Consolacion del Sur, Minas de Matahambre dhe Martinez, njoftoi agjencia kubane e lajmeve (ACN).