Maqedoni: Akuza ndaj tre ish-ministrave të Bujqësisë

Policia maqedonase ka ndaluar të premten tre ish-ministra dhe një ish-zëvendësministër të Bujqësisë dhe ata janë dërguar menjëherë në gjykatë, nën akuzat për shpërdorim të detyrës. Njëri nga ta, Lupço Dimovski, është aktualisht deputet dhe po ashtu i amnistuar në lidhje me ngjarjet e dhunshme të prillit të 2017-s në Parlament.

Të akuzuarit e tjerë janë ish-ministrat Aco Spasenovski dhe Mihail Cvetkov dhe ish-zv.ministri Kristijan Delev. Tre të parët ishin, apo vazhdojnë të jenë përfaqësues të Partisë Socialiste, aktualisht në opozitë, ndërsa z. Delev është kuadër i VMRO-DPMNE-së, shkruan voa, përcjell albinfo.ch.

Vepra e tyre penale ka të bëjë me shpërdorimin e ndihmave bujqësore dhe dhënien me qira të tokave bujqësore në pronë të shtetit gjatë periudhës prej vitit 2009 – 2016.

Ministri i Rendit i Maqedonisë, Oliver Spasovski, u tha mjeteve të informimit se dëmi që kishin shkaktuar të akuzuarit arrinte një vlerë prej 1,4 milionë eurosh.