Lluka: “Orange” nga Franca e “A1” nga Austria, të interesuara për Telekomin

Ministri i Zhvillimit Ekonomik, Valdrin Lluka, ka parashikuar “pako atraktive financiare” për punëtorët që vullnetarisht duan të largohen nga vendet e tyre të punës në Telekom, pas privatizimit.

 Në Interaktiv të KTV-së, Lluka ka shpjeguar procesin që do të çojë te privatizimi. Procesi i privatizimit, sipas Llukës, do të ndodhë kah fundi i vitit, teksa në gjashtë muajt e parë fokusi do të jetë në ristrukturim. Lluka ka thënë se Qeveria ka një marrëveshje me BERZH-in lidhur me Telekomin, duke treguar se fillimisht bëhet ristrukturimi, pastaj bëhet investimi nga BERZHI-i për të përgatitur rrugën drejt privatizimit, përcjell albinfo.ch

Në këtë proces të tërësishëm, Lluka ka thënë se qeveria është dashur të zotohet për privatizim të Telekomit, për të cilin tha se është zgjidhja më e mirë. Lluka ka thënë se qeveria planifikon që të mos bëjë privatizim të plotë të Telekomit, por që të mbetet aksionare në vlerë nga 25 deri 40 për qind. 

Sa u përket kompanive të interesuara, Lluka ka përmendur disa prej tyre, përfshirë “Orange” nga Franca e “A1”-shin austriak.