Bankierët shqiptaro-zviceranë

Ky numër i Albinfo.ch që u kushtohet gjeneratave të reja, të dala nga familjet shqiptare dhe që janë të inkuadruar në sektorin financiar dhe të kredive në Zvicër

Në opinionin mbarëshqiptar ende mbretërojnë stereotipe mbi pjesëtarët e diasporës shqiptare, duke i perceptuar ata si ‘gasterbajterë’ të pakualifikuar.

Ky numër i Albinfo.ch që u kushtohet gjeneratave të reja, të dala nga familjet shqiptare dhe që janë të inkuadruar në sektorin financiar dhe të kredive në Zvicër, sjell të dhëna dhe portrete, të cilat i thyejnë këto tabu ndaj komunitetit tonë.

Ndër klishetë që thyen kjo dosje speciale është edhe tendenca për ta konsideruar komunitetin shqiptar si jashtë sistemit. Rritja eksponenciale e numrit të të rinjve shqiptaro-zviceranë në sektorin bankar dhe të kredive vetëm sa e dëshmon integrimin gjithnjë e më të thellë të një numri të konsiderueshëm të pjesëtarëve tanë në Zvicër dhe më gjerë.

Veç kësaj, të rejat dhe të rinjtë që shprehen në këtë numër thyejnë idenë e bankierëve arrogantë dhe të pasur. Modestia dhe syçeltësia e personave të portretuar në këtë numër reflekton pikërisht të kundërtën, sepse ato dhe ata dallohen krejtësisht nga mendjemadhësia e disa individëve shqiptaro-zviceranë që janë pasuruar shpejt, duke filluar me shitje të kredive apo sigurimeve pranë komunitetit shqiptar në Zvicër dhe më gjerë.

Inkuadrimi sistematik i të rinjve shqiptaro-zviceranë në Zvicër në sektorin terciar të shërbimeve ka një domethënie të veçantë. Të ushtrosh profesionin financiar dhe të sigurimeve, në vendin më të njohur në botë për këto fusha, përmban një dimension simbolik, sidomos për familjet e shumta shqiptare, të cilat kanë braktisur vendin për një kafshatë buke. Sot, fëmijët e tyre punojnë në zyrat e qelqit të financës botërore, ku dihet fort mirë se për të ushtruar një profesion të tillë në Zvicër, sidomos për t’u ngritur në hierarkinë e përgjegjësisë në bankat zvicerane me renome ndërkombëtare kërkohen njohuri integrale dhe kompetenca të larta teknike.

Ky ndryshim përmban një satisfaksion me dimension historik, dhe shpresojmë se i gjithë ky kuadër financiar në rritje do të ndikojë, herët apo vonë, në ndryshimin e rolit bankar në vendet e prejardhjes, i cili duhet të jetë në shërbim të ekonomisë, dhe jo të kundërtës.

Prandaj, lexues të dashur të Albinfo.ch, kemi kënaqësinë t’ju njohim më nga afër me disa nga bankierët dhe specialistët e sigurimeve të dalë nga komunitetit shqiptaro-zviceran.

Lexim të këndshëm!

 

 

---