Trump fton Thaçin në Shtëpinë e Bardhë

(AP Photo/Manuel Balce Ceneta)

Presidenti, Hashim Thaçi, njofton se ka pranuar një letër nga Presidenti i Shteteve të Bashkuara të Amerikës, Donald Trump në të cilën i kërkohet atij dhe liderëve të Kosovës që të shfrytëzohet siç thuhet në njoftim “ky moment unik”, që të flasin me një zë, me qëllim të arritjes së marrëveshjes gjithëpërfshirëse me Serbinë.

“Dështimi për të përfituar nga kjo mundësi unike, do të ishte një kthim tragjik mbrapa, sepse një mundësi tjetër për marrëveshje paqësore gjithëpërfshirëse, vështirë se do të mund të përsëritet për një kohë të gjatë”, thuhet në letrën e presidentit Amerikan.

Trump thotë se Shtetet e Bashkuara kanë investuar shumë për suksesin e Kosovës, si një shtet i pavarur dhe sovran dhe duan që Kosva të vazhdojë të zhvillohet .

“Ne jemi të gatshëm që t’ ju ndihmojmë në përpjekjet tuaja për të arritur një marrëveshje, e cila reflekton në mënyrë të balancuar interesat e Kosovës dhe të Serbisë. Një marrëveshje e tillë është e arritshme. Unë pres që në Shtëpinë e Bardhë t’ju mirëpres Ju dhe Presidentin Aleksander Vuçiç, për të festuar atë që do jetë një marrëveshje historike”, ka thënë presidenti Amerikan.