Kurti: Rezoluta ktheu pazaret e vjetra të Thaçit

Lideri i Lëvizjes Vetëvendosje, Abin Kurti ka kritikuar fjalimin e mbrëmshëm te presidenti të Kosovës, Hashim Thaçi në mbledhjen e Këshillit të Sigurimit.

Kurti ka thënë se votimi i së shtunës në Kuvendin e Kosovës për ekip negociator ka rikthyer pazaret e presidentit të Kosovës, Hashim Thaçi me Serbinë në kurriz të shtetësisë së Kosovës, përcjell albinfo.ch.

Kurti ka shtuar se Thaçi me fjalimin e tij në Këshillin e Sigurimit të OKB-së iu rikthye kohës kur fliste për kompromise të dhimbshme.

“Pra, Thaçi po i kthehet gjuhës së verës 2018, para protestës madhështore e masive të 29 shtatorit, po i kthehet kohës kur fliste për ‘kompromis të dhimbshëm’ dhe ‘korrigjim të kufijve’. Vëreni me kujdes, tash flet sërish për ‘vendime të vështira’ dhe kundërshton atë që e quan ‘shkëmbim popullatash’, por nuk flet për integritet territorial dhe nuk kundërshton shkëmbimin territorial dhe as ndarjen e Kosovës”, ka shkruar Kurti në reagimin e tij.