Remi: Lufta e UÇK-së, e pastër, do ta vërtetojë edhe Specialja 

Ish-komandanti i UÇK-së, Rrustem Mustafa-Remi, i cili do të jetë i intervistuari i parë i Gjykatës Speciale, sot ka shkruar në profilin e tij në Facebook, prej ku është shprehur se eprorët e UÇK-së do të dalin faqebardhë. 

“Unë jam nga ata që kam përkrahur Gjykatën Ndërkombëtare, ne duhet të mbyllim kapitullin e viteve të kaluara. Jam i sigurt se gjatë kohës së luftës në Kosovë nuk ka krime të kryera që mund të përkufizohen si krime lufte, fjalët dhe propaganda sugjestive si dhe percepcionet e krijuara për UÇK-në e di se do të rrëzohen dhe ne, edhe individualisht, eprorët e UÇK-së, do të dalim faqebardhë”, ka shkruar ai. 

Tutje, Mustafa ka shtuar se pret që Gjykata Speciale ta zgjerojë fushëveprimin e saj dhe të ndiqen krimet ekonomike, të ndiqen ata që, në mënyrë të orkestruar, kanë keqpërdorur asetet kombëtare, si pronat, ndërmarrjet publike deri te defunksionalizimi i institucioneve vitale në vendin tonë. 

“Mendoj se ka pasur një koordinim të qarqeve “akademike” e shoqërore për të defunksionalizuar të gjitha ato institucione të krijuara me mund, si gjykatat, universitetet dhe gjithçka që i jepte frymë zhvillimit dhe rrugës së vendit për ecje së mbari”, ka shkruar Mustafa.