Fajon: Kosova meriton liberalizimin e vizave

Raportuesja për liberalizmin e vizave në Parlamentin Europian, Tanja Fajon, ka deklaruar në Bruksel se qytetarët e Kosovës e meritojnë lëvizjen pa viza, sipas saj, Prishtina i ka përmbushur kushtet e vendosura.

Fajon gjithashtu u shpreh e zhgënjyer nga mungesa e vullnetit për liberalizmin e vizave për kosovarët, e kërkoi nga institucionet e Kosovës që kërkesat e tyre t’ua drejtojnë më drejtpërdrejt vendeve anëtare, e jo thjesht institucioneve të BE-së, shkruan Topchannel, përcjell albinfo.ch.

Këto komente ajo i bëri në një panel të konferencës “BE dhe Balkani Perëndimor”, të organizuar nga “think tank”-u “Friends of Europe”.

Ajo gjithashtu u shpreh se qytetarët e Kosovës e meritojnë liberalizmin e vizave, sepse ata e kanë bërë punën e tyre.

“Ne si institucione të Bashkimit Europian kemi bërë shumë presion te kosovarët që ata të përmbushin kërkesat dhe ata e bënë një gjë të tillë, të cilën Komisioni e ka pranuar. Sa u përket institucioneve europiane, Prishtina e ka ‘dritën e gjelbër’. Tani është në dorën e qeverive të vendeve anëtare”, shtoi Fajon.

Ajo specifikoi Gjermaninë dhe Francën, si dy vende kyçe, ku procesi i lberalizimit është bllokuar. Fajon tha se në emër të Parlamentit, së bashku me europarlamentarin Kukan do të shkruajnë një letër, përmes së cilës do të kërkohet nga vendet anëtare që të kalojnë liberalizimin e vizave për kosovarët.