Hahn: Mos u bëni peng i datave, vizat në 2020-ën

Komisari evropian për Zgjerim, Johannes Hahn, në një konferencë gjatë vizitës në Kosovë ka thënë se Bashkimi Europian është zhgënjyer dhe është befasuar me ngritjen e taksës ndaj produkteve të Serbisë nga ana e Kosovës.

“Të gjithë kemi qenë të befasuar dhe të zhgënjyer kur u vendosën tarifat doganore ndaj Serbisë dhe kjo nuk duhet të mbetet në fuqi, por të fokusohemi në fushat e lartpërmendur dhe në BE jemi në dijeni për vështirësitë aktuale në tregti dhe në të gjitha takimet e mia kam propozuar që të fokusohemi në zgjidhjen e çdo gjëje që kanë të bëjë me tregtinë ndërmjet dy vendeve”, tha Hahn në një konferencë.

Ai tha se çështja e vizave pret edhe disa muaj, ndërsa kërkoi që qytetarët kosovarë të mos rrinë peng i datave, të cilat jepen për liberalizim vizash.

“Puna është kryer nga Kosova dhe ishte radha jonë të implementojmë dhe kjo ka nisur me raportin dhe është marrë Parlamenti, i cili ka vendosur me një shumicë. Tash çështja ndodhet në Këshillin Evropian, i cili merr më së shumti kohë për ta kaluar këtë hap të procesit dhe kam besim dhe se viti 2020 është më realisti, por mos u bëni peng i numrave”, porositi Hahn.